Creux du Ven

Creux du Ven

Hoi, es isch Summerziit und mir mached wider vil Uusflüg.

Ir au?

Vomene bsunders schöne Uusflug, wo mir dä Summer gmacht hend, möcht-i öich verzelle.

Gschtartet si-mer im Chalet Robert, wo under em Creux du Ven liit.

De Creux du Ven isch so öppis wie-n-es natürlichs Amfitheater.

Wenn mer vo Nöieburg richtig Val de Travers fahrt, denn gseht mer ne underwägs au scho vo de Schtross uus.

De normalerwiis so grüeni, sanft gwälleti Jura nimmt es abrupts Ändi und es goht grad is Loch abe.

Also zum ufelaufe vom Chalet Robert uus isch es sehr e schteile Wäg, wo i zwöi Schtund a oberi Rand vo dere wunderbare Natur-Arena füehrt.

Di meischte Wanderer sind scho wider uf em Heiwäg gsi, bis mir üs ändlich uf de Wäg gmacht hend.

Üs het s nid so pressiert, wil mir hend wölle uf em Bärg obe i-mene Masselager bi de Soliat Hütte übernachte.

Vo dobe he-mer e wunderbari Uussicht gha und sind noch emene guete Fondü no de Sunne-n-undergang über em französische Jura go luege.


Am nöchschte Tag si-mer extra für de Sunne-n-Uufgang am halbi Füfi wider uufgschtande und uf d Krete füre gange, aber mir sind nid elei gsi.

Es het no einigi anderi Schauluschtigi Früehuufschteher gha. Wie-n-er chönd gseh, isch es sehr e schöne Sunne-n-Uufgang gsi. Die Flächi, wo do unde so glänzt, das isch de Bielersee.

Ganz churz sind üs au no zwöi Schteiböck begägnet. Aber ich glaub es het ne z vil Lüüt gha uf em Bärg und si sind i die schteili Wand abegchlätteret, wo mir si bald us de-n-Auge verlore hend.

Alles in allem isch es sehr e-n-iidrückliche Uusflug gsi, wo-n-ich öich wärmschtens cha empfähle.