Es Unwätter

Geschter het’s z Gänf es grosses Unwätter gäh.
Es het schtarchi Windböe gha.
Und es het heftig ghaglet.
D’Hagelchörner sind so gross gsi wi Truube.

S Auto vo mim Kolleg isch vo Dachziegu beschädigt worde.  Dä Dachziegu het em d’Windschutzschiibe iigschlage, so dass er mit em Zug het hei müsse.
Wäge-m Unwätter hend umgrüerti Böim öppe für drü Schtund d’Schine zwösche Losanne und Gänf blockiert. Drum bin i geschter z’Abig ersch am zwölfi heicho.
Au uf em Flughafe z’Gänf sind d’Flugzüg beschädigt worde. E Easyjet isch dur die Hagelwolke gfloge und jetzt isch er ganz verbüület und verschlage.

---

E Winterschturm

De Urs het nid so guet gschlofe. Ich weiss aber nid gnau, was mit em los isch.
Vilicht isch es de Schturm gsi. Mir hend de Wind i de Nacht guet ghört. Hüt isch es scho chli besser als geschter. Geschter si-mer nid emol mit de Elsa is Ballet gange. Es het fescht gschtürmt und grägnet.
Hoffentlich goht s schnäll verbii.
​

2 Meter Nöischnee i de Bärge

Ich ha hüt am Morge scho Ziitig gläse.
Det isch gschtande, dass es i de letschte Täg i de Bärge 2m Nöischnee gäh het.
Im ganze Alperuum het s e grossi Lawine-Gfahr.
Zermatt und Saas Fee sind vo de Umwält abgschnitte.
D Schiipistene sind zue und näbe-m Schnee macht ine de Wind no z schaffe.S einzige Verchersmittel isch im Momänt de Helikopter.

Z Züri hingäge isch es am Tag vil z warm.
Mir hend bis zu 13 Grad warm am Tag!

D Wättervorhärsag für das Wuchenänd isch guet.
Und de Schnee isch wunderbar!
Vilicht gohn-n-i drum das Wuchenänd go schiifahre.

Schturmschäde

Letscht Wuche het s e grosse Schturm gha, wo vil Schäde aagrichtet het.
I de Nöchi vo miim Huus isch e grosse Wald mit emene chline Bärg. D Waldschtrosse sind zue, wil vil grossi Böim umgheit sind und d Schtrosse blockiered.
D Waldarbeiter sind immer no am uufruume, aber si hend no vil z tue.
Es gseht uus wie uf emene Schlachtfäld.

​