Talking about dates and feasts in Swiss German with Dialogue and audio file.

Feasts during the year 3 - Fäscht während em Johr 3

Gnau so lang wi d Faschteziit goht nochhär d Oschterziit, wo grad mit em Früehlig zämefallt. Das passt guet zum Uferschtehigsfäscht.
Noch Uuffahrt (Chrischti Himmelfahrt), wo di meischte Lüüt es verlängerets 4tägigs Wuchenänd hend, isch nochhär am 24. Mai Pfingschte de nöchscht gross Meileschtei im Chilejohr. Es isch de Geburtstag vo de Chile, wil do de Hl. Geischt uf d Jünger cho isch und us Feigling muetigi Aposchtle gmacht het. Ou do isch am Pfingschtmäntig offizielle Fiirtig.
A Fronlichnam, hür am 4. Juni, mit sine vilne Prozässione Land-uuf und Land-ab git's wider es verlängerets Wuchenänd. Vom Donnschtig bis am Sunntig, aber nid überall, wil das ebe-n-e katholische Fiirtig isch.

Im Summer fiired mir de erschti Ouguscht, das isch de Schwiizer Nazionalfiirtig. Do gits überall grossi Erscht-Ouguscht-Füür, vil Füürwärk und Rede vo Politiker. Usserdem het's sich iibürgeret, dass mer a vilne Orte uf em Buurehof cha go bröntsche.

A-mene Sunntig im Septämber isch de Eidgenössischi Dank- Buess und Bättag.

Im Novämber isch no Allerheilige am erschte und Allerseele am zwöite Novämber. Aber nur de erscht isch e Fiirtig und fallt meischtens i d Herbschtferie. Zu dere Johresziit bätted mir vil für die Tote.