S Zimmer iirichte

Wächelpräpositione:
i, uf, 
under, über,
rächts/ lings näbe, 
vor, hinder,
a, 
zwüsche,

Woäne chunt …? ---- AKKUSATIV

Wo isch …? ---- DATIV

Ich bi früsch züglet und mues jetzt miis Zimmer nöi iirichte. Du hilfsch mer debi. Los guet zue und mach e Zeichnig vo miim Zimmer, dass d nochhär alles richtig chasch äneschtelle.

Tue s Bett bitte a di vorderi Wand i linge Egge.
Näbe s Bett schtellsch s Nachttischli.
I (de) Egge hinde links, under s linge Fenschter chunt s Pult.
Zwüsche di beide Fenschter chunt s Büechergschtell.
I (de) rächti Egge hinde, a d Wand mit de Tür schtellsch bitte d Kommode
und denn rächts a di vorderi Wand, grad näbe s Bett, chunt de Chleiderschrank.
D Schtereo-Aalag chasch is Büechergschtell ineschtelle und de Kompiuter ufs Pult.
D Gitarre chunt rächts näbe d Kommode und d Pflanze chasch uf d Kommode schtelle.
Ich glaub det het si gnueg Liecht, gäll?
Au ja, wenn d no Ziit hesch chönntisch d Lampe a d Tili ufhänke
und wenn alles fertig isch chunt no de Teppich i d Mitti vom Zimmer.
​Die alte Vorhäng tü-mer nüme ufhänke, aber s Bild mit de bärner Bärge möchti über miim Bett ha.

Isch alles klar? Ich dank-der für dini Hilf.

So, jetz isch alles gmacht: Säg mir, wo d d Möbel änegschtellt hesch:

Antwort: 

S Bett isch a de vordere Wand im linge Egge.
Näbe-m Bett isch s Nachttischli.
Im Egge hinde links, under em linge Fenschter schtoht s Pult.
Zwüsche de beide Fenschter isch s Büechergschtell.
Im rächte Egge hinde, a de Wand mit de Tür schtoht d Kommode
und denn rächts a de vordere Wand, grad näbe-m Bett isch de Chleiderschrank.
Schtereo-Aalag isch im Büechergschtell und de Kompiuter uf em Pult.
D Gitarre schtoht rächts näbe de Kommode und d Pflanze isch uf de Kommode.
D Lampe hänkt a de Tili und de Teppich liit i de Mitti vom Zimmer.
S Bild mit de Bärner Bärge hänkt au scho a de Wand über em Bett.

​Isch es guet so?